A artista lucense Noemí Núñez (1987) propón a través da pintura e a cerámica na mostra 'Perdendo a forma humana', un percorrido por un universo habitado por criaturas reais ou imaxinarias, personaxes enmascaradas e seres ficticios sorprendidos en momentos de intimidade. A Galería Solaina de Lugo (Rúa do camiño real, 88) acolle ata o 30 de xullo esta exposición que reúne unha selección de obras que exploran o imaxinario íntimo, onírico e fantástico da artista.
A obra de Núñez constrúese a partir do autorretrato como punto de partida, desde onde a artista presenta un proceso pictórico por capas que transforma o rostro nunha nova identidade desligada da súa forma orixinal. A meirande parte da súa obra é pictórica, cunha forte presencia do xestual e o intuitivo, onde a cor, a mancha e o volume fúndense para construír presencias inquietantes e atmosferas densas. O seu traballo combina figuración e abstracción, dando lugar a paisaxes internas marcadas pola emoción, a fantasía, o amor, a morte e o disfrace.
