Foi a proposta máis valorada polo público que participou na edición de 2009 do Roteiro de Creación. María Meijide abriu as portas do seu dormitorio para achegar o seu espazo máis íntimo. Trinta pezas de diferente formato (de lenzos a obras de pequeno tamaño) que achegan a paisaxe persoal da vida cotiá e doméstica desta artista. Foi a exposición gañadora da “Operación Frechazo 09”, iniciativa encadrada do Roteiro de Creación Contemporánea na que o público puntuaba. A mostra, que leva o título de “Lisboa e outros assuntos de cama”, poderase visitar ata o 10 de marzo na sede do Colexio Oficial de Arquitectos de Galicia.
