A galería Dupla, na Rúa Fonte de San Antonio en Santiago de Compostela, ven de abrir a exposición do artista coruñés Diego Cabezas, 'Endless game'. Cabezas (A Coruña, 1975) presenta neste espazo algunhas das súas obras escultóricas máis recentes, feitas en aceiro inoxidable ou ferro, xunto con outras inseridas na súa técnica de escultura de soldadura con ferro habitual nel. Nestas pezas, concibidas coma "debuxos no aire", o artista explora , ademais das súas características formas esquemáticas arredor da figura humana e das caras, o reino animal.
Formado en escultura na EASD Pablo Picaso da Coruña, Cabezas volveu recentemente a residir en Galicia tras anos vivindo en Barcelona, desde onde a súa obra acadou proxección internacional colocando pezas en coleccións particulares de Nova Zelandia, Xapón ou Singapur. A mostra, que conta co patrocinio de NH Collection Santiago, poderá visitarse na galería compostelá ata mediados de maio nos horarios establecidos que poden consultarse nas súas redes.
