Localizan novos petróglifos e unha mámoa no concello de Santiago

O Colectivo A Rula fixo pública a localización de tres novas estacións de arte rupestre e unha mámoa no val de Figueiras e no monte de Parabeche, en Santiago de Compostela. Os petróglifos atópanse nas ladeiras do rego de Porto Marelo. No caso do petróglifo de Porto Marelo 2, destaca unha gran combinación circular de cincuenta centímetros de diámetro e sobre todo unha figura idoliforme con paralelos no petróglifo de Outeiro do Corno e noutros puntos da costa galega e cantábrica. Os petróglifos de Sixto de Fóra 1 e 2 contan no primeiro caso con numerosas coviñas e foi seriamente afectado pola extracción de pedra. No segundo caso, o petróglifo amosa combinacións circulares. Por último, a mámoa foi localizada na contorna do cruceiro de Parabeche e ten "boas dimensións e aparente boa conservación", cun diámetro de vinte metros.