Localizan un conxunto de petróglifos nun valo de Vilanova de Arousa

La Voz de Galicia publicou hoxe un novo achado de petróglifos, desta volta incorporados ao peche dun valo na parroquia de San Miguel de Deiro (Vilanova de Arousa). Trátase de dúas combinacións circulares e coviñas que foron extraídas dalgunha estación rupestre e incorporadas á construción. As gravuras foron localizadas por Manuel Santiago Brandón, membro da Brigada Forestal do concello, quen estaba a desbrozar a área e se fixou nun dos motivos. A pedra ten 120 centímetros de longo por 46 de ancho e conserva vinte coviñas xunto con dous motivos circulares, un deles moi desgastado e que só foi recoñecido tras o emprego de técnicas fotogramétricas. Segundo o Colectivo A Rula, quen investigou o achado e o comunicou á Dirección Xeral de Patrimonio, o petróglifo debeu ser movido desde o seu lugar de orixe e suxiren que poden existir máis gravuras aínda nese lugar. A Rula tamén sinalou que o achado de petróglifos extraídos do seu emprazamento e incorporados a construción non deixan d ser "feitos testemuñais e pouco frecuentes en relación coas descubertas de petróglifos ao ar libre".