Desde este 3 de xullo a sede da Fundación Gonzalo Torrente Ballester, en Santiago de Compostela, acolle a que será a súa exposición permanente. Co título Gonzalo Torrente Ballester. Itinerario de vida e creación, a mostra fai un percorrido pola biografía do homenaxeado a amosar múltiples obxectos persoais, cun total de 130 pezas.
O proxecto, comisariado por Carmen Becerra e Darío Villanueva, adapta os contidos da mostra itinerante que, desde 2024, se puido ver na Biblioteca Nacional de España e mais no Concello de Ferrol. Entre outros contidos, amosa primeiras edicións das obras do autor, manuscritos ou fotografías familiares que acompañan o seu percurso vital desde o nacemento en Ferrol ata o seu falecemento en Salamanca. De xeito paralelo, a entidade acaba de estrear o seu novo espazo web, no que recolle múltiples contidos sobre o escritor.
