Ferrol acolle a exposición que conmemora os 25 anos da morte de Torrente Ballester

A exposición coa que a Biblioteca Nacional de España conmemorou en 2024 os 25 anos do falecemento de Gonzalo Torrente Ballester chega a Galicia. O centro cultural ferrolán que leva o nome do escritor abre este 8 de marzo Gonzalo Torrente Ballester, La Travesía de un Creador, un percorrido pola biografía do autor que amosa fondos bibliográficos, gráficos, documentais e materiais conservados tanto na propia Biblioteca Nacional como na Fundación Gonzalo Torrente Ballester de Santiago de Compostela.

Os contidos do proxecto, que foi comisariado por Darío Villanueva e Carmen Becerra, artéllanse a través dos múltiplos lugares nos que viviu o autor, "Ferrol / Santiago / Oviedo / Burgos / Madrid / Mallorca / Pontevedra / Albany(USA) / Vigo / Ramallosa / Salamanca", lembra a presentación da mostra.

Ademais a montaxe explora "como e en que momento foron xurdindo as diversas facetas nas que se despregou a súa actividade intelectual e artística", e lembra que, ademais de narrador, Torrente foi historiador, ensaísta, articulista, crítico literario e teatral, guionista cinematográfico ou fotógrafo.

Canda ás 130 pezas expostas, tamén se pode ver o documental GTBxGTB, producido en 2010 pola Sociedad Estatal de Conmemeoraciones Culturales (SECC) e a Fundación Gonzalo Torrrente Ballester canda a pezas cedidas por diferentes institucións e particulares.

A maiores dos contidos que se puideron ver e Madrid, a mostra engade un apartado que recolle a través de diferentes fotografías a presenza de "escritores do máximo nivel que viñeron a Ferrol en distintos momentos" para falar do autor.