O CCG abre acceso a un importante fondo de propaganda política galega

Máis de 3000 documentos que inclúen carteis, comunicados, pegatinas, posters e todo tipo de materiais de propaganda política compoñen o Fondo Miguel Gutiérrez de Propaganda Política que desde hoxe está accesible no web do Consello da Cultura Galega. Miguel Gutiérrez é un coleccionista que atesoura todo tipo de materiais de propaganda e actividade política desde as últimas décadas da dictadura franquista ata a actualidade. O fondo dá acceso a máis de tres mil documentos que permiten ver a evolución dos discursos e das estéticas políticas de todo o espectro ideolóxico en Galicia, e a información pode ser recuperada de múltiples maneiras. A catalogación e investigación do fondo foi levada polo grupo Hispona da facultade de Historia da Universidade de Santiago, nun proxecto liderado polo catedrático Emilio Grandío.