O portal Terra e Memoria compila a memoria oral do século XX

A Facultade da Historia da Universidade de Santiago acollía esta mañá a presentación de Terra e Memoria, o portal web no que o Departamento de Historia pon na rede os seus fondos de memoria oral. Os grupos de investigación HISTAGRA, HistAMÉRICA e HISPONA poñen en común preto de 2.000 entrevistas que fan parte dos fondos do proxecto Nomes e Voces e da iniciativa Historia Oral de Galicia. Represión, emigración, vida cotiá, lembranzas de feitos históricos e todo tipo de narracións atópanse neste conxunto que, segundo apuntou Pilar Cagiao, coordinadora do Grupo de investigación de Historia de América da USC, "xa é un patrimonio común en si mesmo" que procura "crear fontes para a Historia". Pola súa banda, Emilio Grandío, coordinador do grupo de Historia Política e dos Nacionalismos da entidade, apuntou que con esta iniciativa "dáselle voz ao pasado e vóltaselle o pasado á sociedade", xa que, ao seu ver, "para a sociedade non é posible recoñecerse só coa documentación escrita".

Por mor da Lei Orgánica de Protección de Datos e polas diferentes condicións dos informantes, o novo portal establece diferentes niveis de acceso. Deste xeito, hai acceso libre ás fichas de 2.162 entrevistas, mentres o rexistro aberto no web facilita acceso a 70 fragmentos de audio e un aceso específico para investigadores achega aos interesados a totalidade dos fondos dispoñibles. O proxecto, que recolle trinta anos de traballo dos grupos participantes, está aberto a novas achegas por parte do público.