Unha plataforma sonora para o coñecemento de Galicia (e do mundo)

O Consello da Cultura Galega abriu hoxe o seu servizo de podcasts Ágora, un acceso temático a numerosos recursos sonoros da institución como conferencias e producións sonoras dramáticas. As conferencias están seleccionadas a partir das numerosas xornadas e eventos da institución, e distribuídas tematicamente para ofrecer contidos para diferentes intereses desde o punto de vista da formación, co coñecemento da sociedade contemporánea e do entretemento. O obxectivo é incrementar a oferta de contidos sonoros en lingua galega a través de voces e contidos de calidade. Ágora actualizarase periodicamente con máis conferencias e recursos sonoros do fondo do CCG máis producións propias, gravadas especificamente para formatos de podcasting, que se irán coñecendo nos vindeiros meses.