Un total de 170 formacións artísticas do país fan parte do programa, que conta cun orzamento de 530.000 euros, a sumar as achegas da Xunta e dos diferentes concellos que participan da iniciativa. A narración oral de Cris de Caldas abrirá o programa este 15 de xuño en Barreiros, e ese mesmo día poderán verse en Paderne O medo é libre, de Ángeles Goás, e as montaxes A historia de Brancaflor, a cargo de Fran Rei, e O último que apague a luz, de A Vela Circo en Vilagarcía de Arousa.
Ata o vindeiro 31 de agosto sucederanse as propostas, das que 114 corresponden a representacións de teatro e danza, con compañías como A Cova das Letras, A Familia Bocaprier, Bandullo Azul, Fran Sieira Compañía de Danza, MeRe Clown, Migallas Teatro ou Nelson Quintero.
A maxia concentra 36 das funcións do programa, a cargo do Mago Teto ou Mago Antón, mentres que o circo contemporáneo protagoniza 73 citas a cargo de formacións como As Sircópatas, Circo Chosco, Peter Punk Pallaso, Pistacatro ou SU.MA. Os espectáculos musicais suman 87 concertos da man de formacións como A Banda do Verán, Emilio Rúa, Mekánica Rolling Band, Odaiko ou Pakolas.
A Coruña acollerá 102 das actuacións do programa, mentres en Lugo desenvolveranse 68, en Pontevedra 82, e en Ourense serán 57.