Cultura no Camiño volta con 369 actuacións

A Axencia Galega das Industrias Culturais presentaba esta mañá a cuarta edición de Cultura no Camiño, que bota a andar o 16 de abril e se desenvolverá ata o 30 de setembro. O programa medra e achegará un total de 369 actuacións de 149 formacións artísticas galegas a un total de 99 concellos polos que transcorren rutas xacobeas. A iniciativa suma así seis municipios e máis de 50 espectáculos a respecto do pasado ano. Maxia, novo circo, danza, música ou teatro danse cita no que é o principal circuíto cultural que promove a Xunta. Lulavai, De Vacas, Radio Cos, Roi Casal, Rosa Cedrón, Uxía & Narf, Xoán Curiel, Peter Punk, Federico Pérez, Grupo Chévere, Caramuxo Teatro, Ghazafelhos, Os Sete magníficos + 1 ou o Mago Teto, son algúns dos nomes que fan parte desta iniciativa.

Na presentación do evento, que se desenvolveu esta mañá no Museo das Peregrinacións, o conselleiro de Cultura, Román Rodríguez, destacou que o proxecto practicamente triplicou orzamento e alcance desde o seu nacemento. Para alén da Consellaría de Cultura, participan nesta iniciativa Turismo de Galicia e Gadis como patrocinadora.