O retorno do máxico explora a maxia das fragas desde a arte contemporánea

O Pazo de Fonseca, en Santiago, acolle ata o vindeiro 28 de xuño a exposición O retorno do máxico. Paula Cabaleiro comisaría este proxecto da Universidade de Santiago que conta con obras das madrileñas Consuelo Chacón e Patricia Mateo e mais do artista, tamén madrileño, José Luis López Moral.

Segundo sinala a presentación da iniciativa "este proxecto multidisciplinar, que transita fotografía, pintura, vídeo, instalación e son, adéntrase dende a arte, a experiencia e a natureza no universo das meigas, do patrimonio botánico e da tradición galega, no imaxinario das lendas e das supersticións, nos saberes populares que tan firmes alicerces teñen construído na cultura senlleira do noso país".

Os tres creadores "conciben a través das súas creacións mundos máxicos, cheos de simbolismo e ambigüidade, atmosferas de ensoñación e simulacro que transitan entre o real e o ficticio, reivindicando o valor da sabedoría popular e da natureza, a raíz da identidade cultural galega, o papel das 'bruxas' e dos relatos que se tecen nas marxes do discurso sistémico". A instalación pode visitarse de luns a venres de 11.00 a 14.00 e de 17.00 a 20.30 horas.