O Concello de Ares acolle os vindeiros 20 e 21 de maio Rural Lab-Ferroterra. Este proxecto, da Fundación Gabeiras e a Fundación DIDAC pretende "impulsar o desenvolvemento sostible e a innovación en contornas rurais".
As oportunidades da dixitalización para a contorna rural protagonizan a primeira sesión desta iniciativa, nun encontro que contará coa participación de Alfons Martinell, director do Grupo de traballo sobre Cultura e Desenvolvemento Sostible da Rede Española de Desenvolvemento SostibleÇ: Susana da Sierra, profesora de Dereito Administrativo na Universidade de Castela-A Mancha; José María Pernas, avogado sénior do Instituto para a Diversificación e o Aforro da Enerxía, e Luís Fernández Martín, avogado de Gabeiras & Asociados.
O programa inclúe a celebración, o día 21 das Xornadas abertas para a creación dun monte soberano, Nas mesmas presentarase o proxecto piloto de Montefaro, deseñado de forma participativa cos axentes locais para lograr un plan de explotación do monte sostible. No encontro analizaranse experiencias similares en Galicia e noutros lugares da Península e desenvolverase un obradoiro participativo. Ademais, Christian García Bello realizará unha intervención artística no transcurso da actividade.
