O Consello da Cultura Galega acolle esta tarde do martes 13 a xornada "Ansiedade e esperanza na nova cultura". O encontro busca "reflexionar e sensibilizar sobre os problemas das implicacións do capitalismo nos traballos creativos do ámbito cultural", segundo a organización. O programa está coordinado e moderado pola xestora cultural e xerente de Agapi Uxía Caride, e contará coa participación da filósofa Remedios Zafra, sobre "o exceso da vida contemporánea", a psiquiatra Iria Veiga sobre "a saúde mental no mundo cultural" e a xornalista Marga Tojo, que tratará de "Desinformación e malestar colectivo". A xornada retransmítese en streaming a través do web do Consello da Cultura Galega.
