Poucos días despois de entregar as Medallas do Consello da Cultura Galega en agradecemento pola difusión exterior da cultura do país, a institución afronta unha xornada o vindeiro 8 de marzo para reflexionar sobre os escenarios que abre a Lei 10/2021 de Acción Exterior aprobada polo Parlamento de Galicia para a cultura. Inaugurado por Rosario Álvarez e o vicepresidente 1º da Xunta, Alfonso Rueda, a xornada tratará sobre as novidades que ofrece a lei, as especifidades do eido cultural e o exemplo da cooperación no sector audiovisual, a través dunha mesa na que participarán representantes da CRTVG, RTP, Agapi e outras entidades.
