Restauran 40 pezas de arte sacro do arcebispado de Santiago

O xoves pasado presentouse o avance do proceso de restauración de corenta pezas de arte sacro -sobre todo instrumentos litúrxicos- do arcebispado de Santiago que está levando a cabo a asociación Ourives de Compostela, co apoio da Deputación da Coruña, do concello de Santiago e do Arcebispado de Santiago. As 40 pezas desta primeira fase do proxecto proceden de 13 parroquias de nove concellos da provincia coruñesa. Entre elas as cruces procesionais de san Estevo de Cobas (s. XVIII), Santiago de Betanzos (s. XVIII) ou san Lourenzo de Irixoa (1808). Nos procesos de restauración interveñen ourives destacados de Santiago de Compostela. O proxecto está incluído dentro do convenio de colaboración coa Deputación da Coruña para mellora da competitividade, por un importe de 140.000 euros.