Un dos proxectos das anteriores Residencias Artísticas no Gaiás. Fonte: Xunta de Galicia
O Diario Oficial de Galicia deste 23 de abril fixo pública a convocatoria das cuartas Residencias Artísticas no Gaiás (Rega). O programa da Xunta para apoiar novas propostas creativas oferta nesta ocasión seis axudas dotadas con cadanseus 8.000 euros. Como novidade, a convocatoria ábrese a proxectos de artes dixitais.
Segundo sinala o Goberno Galego, esta incorporación "parte da aposta da Consellería de Cultura, Lingua e Xuventude por dar impulso ao talento galego nunha área cun enorme potencial de desenvolvemento e gran demanda por parte do público". Como exemplos de proxectos que poden optar a estes apoio cita "experiencias inmersivas e interactivas, obras baseadas en procesamento de datos, ou videomapping".
Canda a esta disciplina poderán presentarse á convocatoria proxectos de artes visuais, escénicas, musicais, deseño ou artes dixitais, e valoraranse especialmente iniciativas que aposten polo "enlace con outras disciplinas non recollidas nestas bases". No caso de artes escénicas, concederanse un máximo de dúas axudas.
Ademais do apoio económico, as persoas beneficiarias contarán cun espazo para traballar no seu proxecto durante un período de entre tres semanas e mes e medio nas instalacións da Cidade da Cultura. Ademais, disporán de recursos técnicos e humanos e contarán co acompañamento dunha persoa mentora experta na área creativa á que se vincule a proposta.
