Casa Galega da Cultura. Foto: Álvaro Rodríguez Resino / Wikipedia
O concello de Vigo abriu a convocatoria para a presentación de proxectos expositivos que se seleccionarán para a programación da cidade en 2026. Segundo a convocatoria, "a Concellería de Cultura está a traballar na reorganización dos centros museísticos da cidade, avanzando na segmentación da oferta e na especialización dos espazos. Nesta liña priorizaranse nas salas que son obxecto desta convocatoria as exposicións temporais relacionadas coas linguaxes creativas contemporáneas e as que exploran os grandes temas da sociedade contemporánea, valorando especialmente as propostas artísticas locais e galegas en xeral". Deste xeito, a convocatoria vai destinada a dous espazos, a Casa Galega da Cultura, orientada ao "ao talento creativo das e dos artistas emerxentes de ata 35 anos de idade" e a Casa das Artes, destinado a "artistas, comisarias e comisarios, xestoras e xestores culturais, entidades e outros axentes activos do circuíto profesional". As exposicións levadas a cabo na Casa Galega da Cultura terán un orzamento máximo de 5.000 euros e as da Casa das Artes de 30.000. O prazo remata o 29 de marzo.
