A capela e a contorna das Torres de Oeste, en Catoira, verán obras de rehabilitación por valor de 420.450 euros ao longo dos vindeiros meses. Cando menos, esa é a intención da Xunta de Galicia, que acaba de licitar os traballos neste conxunto logo de que a primeira tentativa ficase deserta.
O pasado mes de agosto, a Xunta de Galicia iniciaba o primeiro proceso de licitación deste proxecto cun orzamento de partida de 300.000 euros. Non entanto, o procedemento fechaba en outubro ao ficar deserta a adxudicación. Este 25 de marzo a plataforma Contratos de Galicia recollía o novo proceso de licitación, cun orzamento incrementado aos 420.000 euros.
Ao igual que o anterior proxecto, os traballos céntranse sobre todo na capela do conxunto, que verá retellada a súa cuberta, contará con novas portas e mellorará o badalo da campá. Ademais, restaurarase a imaxe do Apóstolo Santiago presente no templo e incorporarase un panel informativo no exterior.
Nas proximidades do monumento instalarase un novo posto de información, desmontaranse pórticos de pérgola presentes no camiño e acondicionarase o paseo. As actuacións tamén mellorarán a iluminación exterior da zona e inclúen o mantemento de zonas axardinadas.
Os traballos desenvólvense co apoio dos fondos do Plan de Recuperación, Transformación e Resiliencia da Unión Europea.
