A xunta xeral da Fundación Luís Seoane da Coruña aprobou este xoves a proposta de incorporar tres novos patróns e dar continuidade no padroado ao artista e poeta Manuel Vilariño. Segundo recolle o xornal La Opinión Coruña os patróns vitalicios Manuel Gallego Jorreto e Xosé Díaz Arias propuxeron oito candidatos dos que elevaron a votación da xunta xeral catro deles. Como resultado a fundación buscará incorporar ao seu padroado á Fundación Marta Ortega Pérez (MOP), a crítica e comisaria artística Rosario Sarmiento e ao catedrático de Historia da Arte Jesús Ángel Sánchez, ademais da citada continuidade de Manuel Vilariño. Segundo os protocolos agora daráselles traslado desta decisións aos propios elixidos para que decidan a súa incorporación ou declinen a proposta.
