Premio de Honra Marisa Soto a título póstumo para Xabier Deive

O nome de Xabier Deive (Narón, 1970 - Santiago de Compostela 2024) foi un dos máis lembrados ante o atril dos recentes Premios Mestre Mateo polos seus compañeiros de profesión. A temperá morte do intérprete o pasado ano foi un golpe para o sector audiovisual e teatral. Arestora a Xunta Directiva da Asociación de Actores e Actrices de Galicia (AAAG) ven de concederlle a título póstumo o Premio de Honra Marisa Soto, galardón co que a profesión teatral distingue o labor de persoas e institucións a prol do noso sector escénico. Deste xeito, Deive únese a unha longa lista de homenaxeadas con este trofeo, sendo esta a terceira vez que se concede o galardón a título póstumo, tras as distincións outorgadas en 2015 a Xosé Manuel Olveira Pico e en 2022, a Lino Braxe.

Segundo comunica a Xunta Directiva da AAAG, decide así distinguir a traxectoria de Xabier Deive e "poñer en valor unha vez máis a súa calidade humana, o seu talento artístico e o seu compromiso coa profesión". Con este galardón, o sector escénico quere manifestar "o cariño que sentiu e continúa a sentir" polo intérprete falecido en xullo do ano pasado. A AAAG indica que non concibe a concesión deste galardón como unha despedida nin como un epílogo, "senón como unha celebración plena e agarimosa da figura de Xabier Deive. Un festexo colectivo da persoa, do intérprete e do compañeiro". Xabier Deive exerceu ao longo da súa dilatada traxectoria as profesións de técnico, actor de cine, teatro e televisión. Foi membro da AAAG dende o 1999, integrante da súa Xunta Directiva entre 2002 e 2006 e o seu presidente entre 2019 e 2021.