Xuntanza da primeira sesión do Foro Participativo / Foto: CCG
A primeira das sesións do foro participativo "Un país coa súa lingua" organizado polo Consello da Cultura Galega celebrouse onte con propostas ao redor de mellorar o papel do galego no ámbito educativo e, xa que logo, social. Unha das propostas máis relevantes é a creación dunha "medida piloto que posibilite unha liña de ensino voluntaria na que o galego teña máis presenza, que se desenvolva con carácter experimental, de modo voluntario e consensuado entre todos os axentes implicados (familias e centros) coa finalidade de ser implementada para compensar a menor presenza social do galego". A idea é "garantir a adquisición de competencias lingüísticas equivalentes en galego e castelán, algo que non se estaba a producir segundo as últimas cifras publicadas na Enquisa estrutura a fogares, coñecemento e uso do idioma galego realizada polo Instituto Galego de Estatística". O foro continuará nos vindeiros meses con outras mesas sobre administración, sanidade, comunicación, economía, sociedade e crenzas e un foro aberto en cidadanía. O foro está accesible na rede, pódese participar con cuestionarios ou presencialmente e producirá un documento final coas conclusións dos participantes.
