As galerías de arte protagonizan a xornada 'A Arte en tempo real'

A terceira xornada do ciclo 'A Arte en tempo real' do Consello da Cultura Galega terá lugar hoxe centrando o seu foco na figura das galerías de arte. A partires das 17:00 horas, na sede do CCG no Pazo de Raxoi en Santiago (e con retransmisión en directo pola canle de YouTube e nas redes sociais do CCG) comezará o programa desta xornada coordinada por Luísa Pita que na súa na súa dobre condición de presidenta de 'Contemporánea. Asociación de Galerías de Arte Contemporánea de Galicia', e de responsable da galería que leva o seu nome, fará un percorrido histórico destas entidades. Após a súa intervención falarase da situación actual das galerías de arte en Galicia fronte a outros contextos, da man dos directores das galerías Metro e Dupla, Javier Blanco e Lucía Carballeda Suárez respectivamente, máis Diana Llamazares, directora da galería Llamazares (Xixón) que tamén é presidenta da Asociación de Galerías de Arte Contemporáneo de Asturias.

As galerías de arte atenden a unha múltiple perspectiva. En primeiro lugar achegan ao público diferentes propostas que permiten unha ollada múltiple sobre a realidade que nos rodea. En segundo lugar, potencian o traballo dos artistas, dinamizan o mercado da arte e contribúen a amosar experiencias culturais enriquecedoras. Segundo se describe na presentación desta actividade, as galerías de arte son "un modelo de negocio que navega entre un innegable amor á arte e un mercado da arte desnutrido, cambiante e inestable, sobre todo nos últimos tempos".

Cinco citas coa situación da arte
Arte en tempo real é un ciclo de cinco xornadas organizado pola Sección de Creación e Artes Visuais Contemporáneas que pretende coñecer, en boca dos seus protagonistas, o estado actual da arte na nosa comunidade. No outono de 2024 analizouse a difícil situación que viven os artistas e o comisariado a nivel actual. Por diante quedan outras dúas xornadas para falar de museos, coleccións e publicacións.