Santuario da Peregrina. Fonte: Wikimedia Commons
Resolver os problemas de humidades que afectan á cuberta e ás fachadas do santuario da Peregrina, en Pontevedra. Este é o obxectivo do investimento de 311.319 que anunciaba este 16 de xaneiro a Consellería de Cultura e co que sufragará obras cunha duración prevista de seis meses.
Segundo adiantou José López Campos, responsable do departamento, as actuacións incluirán "substituír a cuberta de chumbo por unha de zinc, realizar impermeabilizacións, reparar canlóns, protexer as gárgolas e cambiar a pasarela de madeira de acceso á cuberta por unha metálica".
As intervencións implican tamén a restauración de elementos escultóricos como a balaustrada, os pináculos e as cornixas, ademais de recuperar as imaxes da virxe da Peregrina, Santiago, san Roque e a da Alegoría da Fe situadas na fachada.
