Nova Galega de Danza presenta a súa antoloxía en tres noites seguidas

A compañía Nova Galega de Danza, baixo a dirección artística de Jaime Pablo Díaz, desembarca na Coruña esta fin de semana para presentar no Teatro Colón un fito único: unha antoloxía con tres das súas pezas máis celebradas e recentes: Leira, Berro e Dique. Nesta 'Antoloxía de Nova Galega de Danza', a muller toma centro do escenario nunha viaxe a través da terra, a raíz, a memoria, a tradición, a resiliencia, o empoderamento e a fortaleza. Serán tres noites (do 17 ao 19 de xaneiro de 2025, ás 20.00h) que, de seguro, pasarán a formar parte da historia da danza na cidade. Con esta iniciativa, que é posible grazas á colaboración da Deputación da Coruña, a compañía botará o pano da celebración do seu 20 aniversario, iniciada a finais de 2023.

Esta mañá tivo lugar a presentación a medios da 'Antoloxía de Nova Galega de Danza' no Teatro Colón da Coruña, na que participaron Jaime Pablo Díaz, director artístico de Nova Galega de Danza; Yoya Neira, deputada de Educación da Deputación da Coruña; a cantante e chelista Rosa Cedrón e o compositor Sergio Moure, colaboradores artísticos habituais de Nova Galega de Danza, que estiveron acompañados polo elenco de bailarinas e bailaríns da compañía, entre eles, o gañador dun Premio Max Iván Villar.

O domingo 19 de xaneiro, unha vez rematada a función de Dique, ás 21.00h, terá un lugar un encontro aberto ao público, no que Jaime Pablo Díaz, director artístico de Nova Galega de Danza, conversará co dramaturgo e investigador teatral Roberto Pascual, director da MIT entre 2009 e 2024. As entradas para o acto son gratuítas, previa retirada dos convites a través da plataforma Ataquilla; os convites están xa esgotados desde o seu lanzamento o pasado 19 de decembro, sen embargo, as persoas que retiraron as súas entradas pero finalmente non poidan asistir, poden facer a devolución dos convites ata este venres, 17 de xaneiro, ás 12.00h, no quiosco municipal da Praza de Ourense en ou escribindo un correo electrónico a: gestiontaquillasimce@coruna.gal. As novas entradas dispoñibles poderán retirarse de novo a través da plataforma online Ataquilla.com.