Marta Pazos dirixe 'Dique' para Nova Galega de Danza

A compañía Nova Galega de Danza desenvolve en coprodución co Centro Coreográfico Galego da Axencia Galega das Industrias Culturais, a montaxe 'Dique', que ten prevista a súa estrea a finais do mes de xuño. Baixo a dirección escénica e escenográfica de Marta Pazos e dirección coreográfica da mallorquina Belén Martí Lluch, a peza contará cun elenco integramente feminino, que executará un diálogo entre danza tradicional e contemporánea, na liña creativa característica da compañía. ' Dique' chegará aos escenarios en virtude dun contrato de coprodución asinado a través da Axencia Galega das Industrias Culturais , que achega máis de 57.000 euros, tras dun procedemento aberto de licitación que acadou Nova Galega de Danza tras resultar excluída a oferta presentada por Mikel Aristegui Tello. Ademais deste procedemento de licitación, a axencia publica convocou tamén en 2023 o seu programa anual de coproducións, unha liña que neste momento xa está concedida a para a realización de outros tres espectáculos que levarán a cabo Elvi Balboa, a compañía La Macana e Cris Vilariño e Diego M. Buceta.

Despois de adentrarse por primeira vez na dirección de movemento co ballet de Debussy Toy Box, en novembro pasado en L’Auditori de Barcelona, a prestixiosa directora de teatro e artista plástica Marta Pazos, asume o convite de Jaime Pablo Díaz, director de Nova Galega de Danza, para poñerse á fronte desta montaxe de gran formato. O director da AGADIC, Jacobo Sutil, asistiu nas instalacións do CCG na Coruña á segunda xornada de audicións organizada pola compañía Nova galega de Danza para escoller as bailarinas que integrarán o extenso corpo de baile deste espectáculo de gran formato. A idea creativa de partida é a reflexión sobre o papel das máis de 200 mulleres que participaron na construción do Dique da Campá de Ferrol, cando se compren 150 anos do inicio dos traballos daquela obra de enxeñeira, que fora punteira no século XIX en España. Dirixida a todos os públicos, incluído o familiar e escolar, canda o espectáculo elaborarase e distribuirase unha unidade didáctica e desenvolveranse diferentes actividades de mediación encamiñadas ao fomento e consolidación de públicos para a danza.

Este contrato de AGADIC con Nova Galega de Danza asínase, segundo o comunicado da AGADIC, en seguimento dos obxectivos marcados no Plan integral para a danza de Galicia. Dentro das medidas recollidas no Plan están o fortalecemento da creación e produción de danza e artes do movemento, o impulso das coproducións do Centro Coreográfico Galego, o fomento da heteroxeneidade e a presenza de diversas disciplinas, o apoio á danza tradicional, o impulso do talento emerxente, o incremento das actividades de mediación e creación de públicos e o impulso á profesionalización da danza e artes do movemento. Con este procedemento preténdese impulsar estes obxectivos, mediante a convocatoria a todo o sector, para que presenten proxectos innovadores no eido de danza artística e as artes do movemento.