O Museo do Pobo inaugura unha exposición sobre a louza de Bamio

O Claustro Alto do Museo do Pobo acolle desde mañá mércores 15 ás 19 horas a mostra Louza de Bamio: memoria, mulleres e territorio que, a través de paneis informativos e pezas de cerámica fai visible a tradición oleira da parroquia de san Xinés de Bamio (Vilagarcía de Arousa) e "pon de relevo a importancia de revitalizar a memoria colectiva sobre un oficio xa desaparecido". A mostra é parte dun "proxecto híbrido" entre a Asociación de Mulleres Rurais de Bamio e a Universidade de Vigo, comandado pola arqueóloga e profesora Beatriz Comendador, e apoiado polo Concello de Vilagarcía. A exposición, que integra fondos do museo e outros recuperados polas propias mulleres de Bamio, pode visitarse ata o 2 de febreiro.