Luís Davila. Fotografía de HombreDHojalata. Fonte: Galipedia
No marco da macroexposición 'Simultánea', que Afundación, ofrece nas súas sete salas de exposición de sete cidades galegas, preséntase unha nova actividade sincrónica co proxecto. O vindeiro xoves 9 de xaneiro, a partir das 18.30 horas, sete destacados ilustradores debuxarán en directo, un en cada unha das salas O público poderá ver en directo como se inspiran, crean e reinterpretan algunha das obras pertencentes á Colección de Arte Afundación. Entre os artistas que participarán atópanse perfís moi diferentes, con estilos, linguaxes e soportes diversos que constatan a riqueza da ilustración. Estarán nas salas de 'Simultánea' destacados humoristas gráficos como Flavita Banana ( A Coruña), Siro (Ferrol) ou Luis Davila (Vigo); artistas cunha dilatada carreira como muralistas de gran formato como Nana (Lugo) ou Iria Fafián (Santiago de Compostela); ilustradoras que tamén experimentan coa cerámica e outros materiais, como Abi Castillo (Pontevedra); ou un nome imprescindible para entender e estudar a banda deseñada de superheroes e aventuras, David Rubín (Ourense).
