O Teatro Principal de Santiago de Compostela acollía este 11 de decembro a gala de entrega da primeira edición dos Premios Manu Lago. A Asociación Profesional de Circo de Galicia recoñece catro propostas de novo circo con estes galardóns que levan o nome do pallaso e malabarista falecido en 2018.
Na gala resultou recoñecido como Mellor Espectáculo de Sala Orquestra de Malabares da compañía Pistacatro. Esta montaxe combina o traballo de seis malabaristas nun ballet aéreo cunha banda de música ou unha orquestra sinfónica nas diferentes localidades nas que se desenvolve.
O mellor espectáculo de rúa foi Circanelo, da compañía N+1 Alfredo Pérez Molino, que combina teatro xestual, danza e acrobacia. O Premio de Recoñecemento pola Promoción do Novo Circo Galego foi para a Asociación Circonove, que desde hai vinte anos desenvolve a súa actividade en Compostela e fundou a primeira Escola de Circo do país.
Estes galardóns naceron para promocionar "a calidade e o talento das artistas e compañías galegas de circo" e recoñecer "o esforzo das súas profesionais". O premio consiste en figuras que lembran a figura de Manuel Lago realizadas pola artista plástica Raquel Germade ademais de diplomas acreditativos.
