Cerdedo-Cotobade acolle un simposio sobre Nélida Piñón

Cando se fan dous anos do falecemento da escritora galego-brasileira, a Deputación de Pontevedra organiza o simposio Nélida Piñón. A mestizaxe dos soños e do corazón. O Centro Cultural Antonio Fraguas, en Carballedo (Cerdedo-Cotobade) acolle a actividade, que se desenvolverá ao longo da mañá do 15 de setembro.

O encontro contará con intervencións do crítico bilbaíno Antonio Maura, da catedrática de Teoría da Literatura salmantina María Ascensión Rivas e do historiador Ramón Villares, que respondeu o discurso de ingreso de Piñón como membro de honra da Real Academia Galega. A xornalista Susana Pedreira correrá coa moderación e no feche actuará a pianista Andrea García.

Segundo lembra a Deputación "Piñón representou a mestizaxe de culturas, conxugando na súa obra a parte espiritual e imaxinativa coa máis terreal. O seu pasado familiar foi clave na conformación dunha autora que sempre reivindicou a súa condición de galega e a lingua dos seus devanceiros, e mantivo unha relación coa provincia de Pontevedra ao vivir dos dez aos doce anos en Cotobade".