Falece a activista cultural María Salvado

Este 11 de novembro falecía en Santiago de Compostela aos 74 anos María Salvado. Considerada unha figura fundamental nos movementos de renovación pedagóxica dos anos sesenta, foi unha das promotoras de entidades como Nova Escola Galega, e fíxose coñecida ao ser a primeira docente en retirar o retrato de Franco e o crucifixo dunha aula pública.

Cunha intensa carreira activista na cultura e na política, en 2015 participou no nacemento da editorial e libraría Chan da Pólvora. Ademais, e segundo lembra a editora, "desempeñou un labor esencial como mentora de diferentes xeracións de poetas, desde Manuel Rivas a Antón Lopo". O seu papel resultou clave, así mesmo, "como ponte entre Xosé Neira Vilas e Anisia Miranda con Galicia durante os anos que viviron en Cuba".

A súa última aparición pública foi o pasado mes de setembro na presentación da antoloxía poética Prefiro condenarme de Margarita Ledo, acto que se converteu nunha homenaxe espontánea á figura de Salvado. "A poesía galega non sería a mesma sen a súa acción", lembra a editora nun comunicado.