Pesar polo falecemento de José Paz, pedagogo e activista cultural

O pasado venres 23 de abril falecía en Vigo José Paz. Fundador e directivo histórico do Cine Clube Padre Feijóo de Ourense, promotor da Xornadas do Cine a comezos dos anos 70 e activista cultural, Paz era coñecido como un dos maiores especialistas en Tagore e posuidor das principais bibliotecas sobre o autor a nivel mundial. Ao longo da súa carreira profesional como pedagogo exerceu como presidente da Federación Galega de MRPs (Movementos de Renovación Pedagóxica) e da Associação Sócio-Pedagógica Galaico-Portuguesa, e facía parte na actualidade da Academia Galega da Língua Portuguesa.

No seu haber figuran, canda a numerosas obras de carácter pedagóxico, artigos e outros escritos, o ter sido organizador de eventos como a Mostra do Livro Português na Galiza ou dos Encontros de Jogos Populares Galaico-Portugueses. Paz acordara o pasado mes de xaneiro coa Deputación de Ourense a cesión da súa biblioteca sobre Tagore, con máis de 30.000 volumes. A entidade, ao igual que o Cineclube Padre Feijoo, a Associaçom Galega da Língua, a Academia Galega da Língua Portuguesa e outras entidades amosaron o seu pesar polo pasamento.