Un total de 120 persoas participan da VII xeira de Compostela Ilustrada

Compostela Ilustrada, o Encontro Internacional de Cadernos de Viaxe chega á súa sétima edición entre os días 7 e 10 novembro. Esta proposta dedicada ao debuxo urbano reunirá a 120 persoas inscritas que, co lema "Volver á universidade", retratarán en diferentes sesións e obradoiros edificios históricos da Universidade de Santiago de Compostela como o Pazo de Fonseca, o Colexio de San Xerome, as Facultades de Medicina e de Xeografía e Historia ou a Igrexa da Compañía.

No seo do encontro celébranse, os días 8 e 9 no Auditorio de Galicia, as Xornadas de Ilustración Urbana, programa de conferencias abertas ao público no que diferentes artistas comparten a súas experiencias en diferentes ámbitos da ilustración. A ilustradora polaca Iwona Flaszczynska abrirá esta sección, na que tamén participarán o francés Pierre Amoudry, o estadounidense Alán Ramiro, a galega Blanca Escrigas, o catalán Daniel Pagans, o murciano Nacho Muñoz e o portugués João Catarino. A complementar esta actividade, Blanca Escrigas elaborará un mural de 2x2 metros no propio Auditorio.

Canda estes nomes, participan desta xeira como convidadas a armenia Sarah-Marie Shaboyan, a asturiana Alba Cuadra e a galega Aldara Prado, que impartirán diferentes obradoiros e clases maxistrais ás persoas participantes. O programa complétase coa exposición O Camiño en Viñetas, que recolle traballos de Fausto Isorna arredor das rutas xacobeas, e mais Rúas Mariñas, unha selección de retratos das rúas compostelás realizadas por Pilar Barral. O encontro acollerá tamén a presentación do libro Compostela Ilustrada 2016-2023, que escolma os primeiros seis anos desta actividade.