Premio de honra CREA para Patricia Ferreira a título póstumo

A Asociación Galega de Profesionais da Dirección e da Realización CREA ven de repartir os seus galardóns anuais, que inclúen nove premios, incluído un honorífico. Neste caso o Premio de Honra tivo carácter póstumo ao ser para a desaparecida realizadora madrileña de orixe galega Patricia Ferreira (Madrid, 1958 -2023), o recoñecemento foi recollido por Carme Rábade nunha cerimonia que tivo lugar na Sala Riquela de Santiago de Compostela. Outro dos nomes desta edición dos galardóns foi o da directora Jaione Camborda, cuxo filme 'O Corno' obtivo o Premio a Mellor longametraxe de ficción e ela acadou a Mención Especial DAMA á internacionalización do audiovisual galego. O galardón á Mellor Longametraxe documental de CREA foi para a realizadora Area Erina pola súa ópera prima 'Aurora' (Gaita Filmes) historia na que dúas mulleres, Aurora e Area, de idades e experiencias distintas, crean unha relación íntima de conversas sobre a morte, a familia, a guerra ou o papel da muller ao longo de dez anos.

O palmarés desta edición dos Premios CREA complétase cos galardóns a outros formatos. No caso das curtametraxes, a realizadora Anxos Fazáns acadou o Premio a Mellor Curtametraxe documental por 'Habitar' e o de Curtametraxe de Ficción foi para Óscar Pardo, polo filme 'Véxote'. A asociación tamén premiou dous traballos de realización en produtos para televisión, o de Mellor Serie foi para Carlos Sedes, polo traballo en 'El Caso Asunta'; o de Mellor Programa de televisión foi para Rafa de los Arcos por 'Megamix brutal'. Nos formatos máis pequenos CREA recoñece tamén os traballos de dirección ao Mellor spot publicitario , que foi para Illa Bufarda por Portu, e o de Mellor Videoclip, que foi para Juan Lesta por 'Estridor 5-7-1', para o músico Carlos Ordóñez