Redrum teatro estrea o espectáculo de monicreques 'Os contos do Lobicán'

A compañía Redrum Teatro estrea este venres sábado no Auditorio Municipal de Teo 'Os contos do Lobicán', un espectáculo musical de monicreques, destinado ao público cativo de entre 3 e 8 anos. Alex Sampayo dirixe e Guillermo Carbajo e Victoria Pérez interpretan e manexan as figuras que protagonizan esta historia que busca darlle a volta aos contos clásicos ao tempo que transmite unha mensaxe educativa e valores universais como a amizade, a cooperación, o respecto pola natureza, o pensamento crítico e a importancia da imaxinación. A dramaturxia, autoría de Eva Mejuto, acadou o XV Premio Barriga Verde 2022. O espectáculo ten xa programada parte da súa xira, e tras Teo irá o domingo 2o ao Auditorio Municipal de Vigo, tras diso, estará en Bergondo, O Grove e Cerceda.

A función convida a nenos e nenas a reflexionar sobre o mundo que os rodea e imaxinar novas posibilidades dun futuro máis inclusivo. Lobicán é un animaliño curioso que goza explorando o bosque e compartindo momentos coa súa familia. A pesar da súa reticencia cara á escola e o estudo, Lobicán mostra un profundo interese por aprender sobre a natureza e o mundo que o rodea. Nai Lobicana pídelle levar unha torta ao avó, e mentres Lobicán está no bosque, atópase con Xiana, unha nena que busca o camiño cara á casa da súa tía Silvana. Sen importar as súas diferenzas, Lobicán e Xiana establecerán unha forte amizade que os axudará a superar perigos e desafíos. 'Os Contos do Lobicán' é unha historia que resalta a importancia da amizade, a aceptación da diferenza e o respecto pola natureza, deixando unha poderosa lección sobre a importancia de valorar as relacións persoais e protexer o noso medio ambiente.