Carballo recupera a figura do pintor Francisco Miguel

O pintor vangardista Francisco Miguel foi asasinado polo franquismo o 3 de agosto de 1936. O seu cadáver, canda os de Juan Boedo Pardo, Andrés Pinilla e o seu fillo Pedro Pinilla, foron recuperados no cemiterio parroquial de Bértoa hai un ano, en escavacións realizadas pola Asociación para a Recuperación da Memoria Histórica. Para conmemorar o seu asasinato e dar a coñecer a súa figura o concello de Carballo organizou actividades e materiais didácticos coordinados polo historiador Hadrián García sobre a figura de Francisco Miguel e o franquismo. As actividades inclúen un obradoiro de batik, a técnica artística practicada por Francisco Miguel, que se celebrará este sábado 28. Ese mesmo día pola tarde celebrarase nas Escolas do Xardín Agra de Caldas unha xornada que contará coas intervencións de Xan Fraga, historiador, profesor e escritor, Carmela Galego, historiadora da arte, Miguel Anxo Fernán-Vello, escritor e editor, Carmen Rodeja, investigadora, David Lozano, investigador, Serxio Castro, arqueólogo, e María Díaz, veciña de Bértoa.