Estréase en Rianxo o proxecto teatral luso-galego 'Entre Palav-bras'

O Auditorio Municipal de Rianxo acolle este vindeiro sábado, 28 de setembro, a estrea de 'Entre Palav-bras', nova produción xurdida da colaboración entre as compañías Butaca Zero e a lusa TEatroensaio . A montaxe inclúe dúas pequenas pezas escénicas nas que ambas compañías cruzan o seus equipos para a xestación dun experimento escénico transnacional. Dous monólogos conforman o resultado: 'Fracturas', escrito e dirixido por Pedro Estorninho, que interpretará Pepa Barreiro, e 'Ergue o cu', escrito por Esther F. Carrodeguas con dirección de Xavier Castiñeira, que interpretará Inês Leite.

'Entre Palav•bras' preséntase como un proxecto de investigación que pretende afondar sobre o impacto que o teatro ten nas mudanzas sociais e civilizacionais, comprendendo o teatro como territorio. Incide tamén na súa calidade de diálogo entre dúas plataformas de produción teatral unidas pola paixón polo teatro político pero separadas por unha fronteira "tan imaxinaria como real", que separa Galicia de Portugal. O Centro Dramático Galego, da Agadic, participa como entidade co-produtora no espectáculo. As dúas pezas xa foron representadas anteriormente por separado, 'Fracturas' en Santiago de Compostela o pasado 14 Xullo no Salón Teatro, como un ensaio aberto e 'Ergue o cu' en Vila Nova de Gaia (Portugal) o pasado 31 agosto.