Atopan un novo baixorrelevo con motivos galaicos no castro de San Vicenzo

O castro de San Vicenzo de Avión segue a ofrecer sorpresas. Tras a aparición dun coidado tríscele durante a escavación do derrubo dunha cabana da croa que fora expoliada hai décadas, onte apareceu outro motivo galaico nunha peza de dimensións similares á anterior. "Puido ter formado parte de algún friso ou outra composición decorativa situada no exterior desta cabana", sinala Jorge Lamas, o arqueólogo responsable da intervención. A peza foi localizada boca abaixo e nas fotografías apréciase a 'impresión' na terra das elaboradas formas. Os traballos están financiados pola comunidade de montes de san Xusto e a Asociación Cultural Viva Avión.