A Fundación DIDAC presenta desde hoxe na súa sede en Santiago de Compostela a exposición 'Galicia. Procesos e formas. Un percorrido gráfico'. Trátase dunha nova versión da exposición comisariada por David Barro que representou a Galicia na última edición da Porto Design Biennale titulada, 'Galicia. Procesos e formas', na que, a partir de obxectos, exemplos de gráfica aplicada, materiais, produtos innovadores e documentos inéditos, entre outras cousas, trazouse un percorrido por certos aspectos do deseño en Galicia que quedou recollido en dúas publicacións. A selección de traballos que se presentan nesta ocasión é unha escolma do material gráfico que deu forma a mostra. Inaugúrase este marte ás 18:00 horas e poderá verse ata o vindeiro 31 de outubro.
