Betanzos acolle o XII Encontro Titiriteiro logo de 5 anos de pausa

Entre os días 5 e 7 de xullo, a vila de Betanzos converterase no corazón dos monicreques do país. A delegación galega da Asociación Internacional de Marionetistas (UNIMA) organiza o XII Encontro Titiriteiro Galego logo de cinco anos sen que houbese unha cita deste tipo para a profesión. O encontro inclúe mesas de traballos, obradoiros e propostas escénicas, e organízase co apoio da Axencia Galega das Industrias Culturais, da Deputación da Coruña e do propio Concello de Betanzos.

Dentro do programa, Isabel Rei, histórica titiriteira e membro de Os Monicreques de Kukas, recibirá o Premio Unima Galiza en recoñecemento á súa carreira. Ademais, celebraranse encontros entre as compañías do país para abordar cuestións como a presenza dos monicreques na programación cultural e mais na Formación Profesional e haberá obradoiros de creación de títeres abertos ao público.

No campo dos espectáculos, o programa abre co Xigante Barriga Verde de Títeres Alakrán, que percorrerá as rúas da Cidade dos Cabaleiros. A Xanela do Maxín, con A Toupiña que quería saber quen lle fixera aquilo na cabeza e mais O Raio de Loubican por conta de Mircromina Teatro completan a programación escénica da xornada.

O día 6 poderán verse as montaxes Unha Armadura de Ferruxe dede Títeres Cascanueces, Picasos Animados de Carmen Domech e mais a Feira das Verdades, na que diferentes compañías amosarán distintos espectáculos. O programa finaliza o día 7 coa representación de Xan Perillán de Os Monicreques de Kukas.

Este encontro supón un novo paso na reactivación de UNIMA Galicia, que elixiu unha nova xunta directiva, presidida por Ton Arenas, en 2022 logo de varios anos sen actividade. A entidade pretende continuar a celebración destas citas de xeito anual por diferentes localidades do país coa intención de ser un punto de encontro non só para profesionais dos títeres senón para todo tipo de axentes con interese no sector.