Unha moi pequena parte do Arquivo Fotográfico Vidal, fondo declarado Ben de Interese Cultural, pode verse desde onte nunha exposición organizada polo Concello de Zas e a Deputación Provincial da Coruña no espazo das Torres do Allo. A exposición '𝗭𝗮𝘀 𝗻𝗮 𝗼𝗹𝗹𝗮𝗱𝗮 𝗱𝗼𝘀 𝗩𝗶𝗱𝗮𝗹' recolle 31 imaxes de entre os milleiros deste arquivo, que teñen en común o feito de amosar distintos lugares e xentes do municipio captadas polos fotógrafos Plácido Vidal Díaz e José María Vidal Eiroa dende comezos do século XX ata finais da década de 1970. O Arquivo que ten na actualidade máis de cen mil imaxes, a maioría vencelladas aos concellos da Costa da Morte, está baixo custodia do Museo do Mar de Laxe, concello que colabora nesta exposición. A mostra das Torres do Allo pode visitarse calquera día da semana xa que ata o 15 de setembro o pazo das Torres do Allo estará aberto ao público de luns a venres de 11:00 a 20:00 horas e os sábados, domingos e festivos de 11:00 a 21:00 horas.
