A Xunta inicia a declaración do Arquivo Fotográfico Vidal como Ben de Interese Cultural

O Diario Oficial de Galicia de onte recollía a resolución da Dirección Xeral do Patrimonio Cultural pola que se inicia incoación do Arquivo Fotográfico Vidal como Ben de Interese Cultural na categoría de colección. Segundo recolle o DOG, este fondo, que fai parte do Arquivo Municipal de Laxe, está formado por "43.475 fotografías en soporte plástico, 5.886 fotografías en vidro e 10.306 en papel, o que supón un total de 59.667 fotografías" realizadas por Plácido Vidal Díaz e José María Vidal García, pai e fillo, desde finais do século XIX ata a década dos anos 70 do pasado século.

A proposta de declaración considera que este material, maiormente vencellado ás comarcas de Soneira e Bergantiños, "constitúe un testemuño gráfico e documental de moito interese para coñecer os costumes, a paisaxe, os oficios, a pesca, a vida política e social, a moda... desta zona da Costa da Morte" e que posúe unha grande "importancia como fonte de información, tanto para a realización de estudos da evolución da propia técnica ao longo do tempo como para a realización de estudos de historia económica, política, social, de historia da arte ou das mentalidades".