Banda á Feira achega a novena arte a Vigo

O barrio do Calvario, en Vigo, acolle entre os días 31 de maio e 2 de xuño o programa da III edición de Banda á Feira. O encontro de banda deseñada da Cidade Olívica conta nesta xeira con convidados que destacan polo traballo no mercado francobelga.

Deste xeito, cóntase coa presenza de autores con carreira alén dos Pireneos, como os cataláns Josep Homs e Javi Rey, que explicará a súa carreira profesional nunha charla. Canda a eles, o mallorquín Pau comparte espazo coa viguesa Alicia Jaraba e mais co lugués Miguel Fernández, que presenta no evento a edición en galego de A espada de San Eufrasio.

Ademais dos encontros con estes autores e autoras, o programa inclúe tres obradoiros a cargo de Kame Cómics da man de María Vilar e Iago Araújo. As sesións de sinaturas do final de cada xornada contarán tamén con diferentes autores locais. O domingo 2 celébrase, no marco desta iniciativa a Praza da Banda, un encontro de autoedición que contará con representantes dunha vintena de propostas artísticas.