Quiosco: Follas Novas 8

A Fundación Rosalía de Castro está a presentar por todo o país a última entrega de Follas Novas. Revista de Estudos Rosalianos. O número 8 da cabeceira, que se pode consultar íntegro na rede, achega artigos sobre a proxección mediática de Manuel Murguía, a cargo de Uxío-Breogán Diéguez, ou a problemática datación de poemas de Rosalía de Castro con versións en galego e en castelán, abordada por Diego Rodríguez González.

Canda a estes, os artigos do volume abordan cuestións como Loucura e xénero en dúas novelas de Rosalía de Castro: La hija del mar (1859) e El primer loco (1881) da man de Marinha Paradelo, ou a presenza da autora en Italia, analizada por Aurora López e Andrés Pociña.

Tamén se trata algo tan curioso como a presenza rosaliana nos proxectos Wikimedia, "onde é un dos elementos da cultura galega con maior pegada", segundo clama Adrián Estévez Iglesias, autor do artigo. Un repaso á actividade da Fundación Rosalía ou a pegada do Padroado Rosalía de Castro na conformación do teatro galego durante o franquismo son outros contidos dispoñibles no volume.