O concello de Pontevedra e Gálix renden homenaxe a Fina Casalderrey cunha exposición

O concello de Pontevedra e Gálix (Asociación galega do libro infantil e xuvenil) inauguraron hoxe pola mañá na praza da Ferraría a exposición "Fina Casalderrey. Medrando entre historias". Trátase dunha mostra composta por 20 paneis escritos por María Lado e ilustrados por Nove Noel na que se aborda a biografía e a obra literaria da escritora, a través das súas palabras e anécdotas. A exposición celebra a traxectoria creativa de Casalderrey, que canda o recoñecemento galego é unha das escritoras galegas con máis recoñecemento internacional no ámbito da literatura infantil e xuvenil. En Gálix destacan que: "é a primeira autora en estar nomeada simultaneamente aos dous premios máis prestixiosos da LIX (Literatura Infantil e Xuvenil) a nivel internacional: o Premio Hans Christian Andersen outorgado polo IBBY e o Astrid Lindgren Memorial Award (ALMA) do goberno sueco".