Un novo edificio romano en Lugo

Unha nova escavación urbana en Lugo, na rúa Ramón y Cajal, revelou a existencia dun "gran edificio romano" posiblemente de "uso público" e unha cronoloxía ao redor do século IV. Os restos achados pertencen a unha estancia cun hipocausto, o sistema calefactor característico romano que daba calor a unha sala de case 70 metros cadrados descubertos ata o momento. Carlos Vilches, da empresa Arqueoxestión, considera que esta sala pode ser das máis grandes atopadas na cidade e que pola localización e o tipo de materiais localizados pode ser de época tardorromana, do século IV. A escavación tamén revelou que o hipocausto foi cegado, é dicir, deixou de usarse intencionalmente.