O Galiverso ofrece unha nova montaxe para explorar o patrimonio dos museos

O Galiverso dos museos é a nova proposta da Cidade da Cultura e a Rede de Museos xestionados pola Xunta. Trátase dunha iniciativa de realidade aumentada que permite "achegarse á colección artística, etnográfica e arqueolóxica conservada nos museos públicos galegos". No proxecto incluíronse 27 obras de arte, restos arqueolóxicos e obxectos, como a escultura do cabaleiro de Beade do Museo Arqueolóxico Provincial de Ourense, o famoso brocado de bronce para os arreos dos cabalos de Viladonga ou o astrolabio máis antigo de Galicia, depositado no Museo do Mar de vigo. Os visitantes tamén se poden mergullar na paisaxe lugrisiana a través do cadro Marina Surrealista do Museo de Belas Artes da Coruña. O proxecto tamén permite accceder a réplicas impresas en 3d de catro das pezas para facilitar o seu acceso a público con mobilidade reducida. A experiencia pode vivirse a partir do martes na Cidade da Cultura, de balde.