Panteón Real. Fonte: Fundación Catedral de Santiago
A comezos deste mes de marzo a Fundación Catedral de Santiago daba a coñecer a nova museografía da Capela das Reliquias e do Panteón Real que acolle este espazo do templo. A entidade realizou melloras na iluminación da capela e renovou a cartelaría e outros elementos expositivos da mesma, ademais de desenvolver diferentes materiais didácticos para dar a coñecer este patrimonio.
Deste xeito, a Fundación editou un libro sobre este ben con textos de varios autores expertos canda a un folleto para o público visitante. Tamén publicou na rede nove vídeos divulgativos e artellou unha guía didáctica sobre estes bens. Todo este material está dispoñible nun web específico e tamén a través do web do Museo da Catedral.
O proxecto O Panteón Real de Compostela: A Alianza do Regnum e o Sacerdotium para a configuración dun Templo Nacional conseguiu o apoio de 10.000 euros por parte da Deputación da Coruña no marco do Fondo de Proxectos Culturais Reino de Galicia 2023.
Segundo lembra a Fundación Catedral, "a capela das Reliquias é un dos espazos máis senlleiros da Catedral de Santiago. Dende o século XVI alberga o coñecido como Panteón Real, por reunir nela unha serie de enterramentos de reis e personaxes influíntes do Reino Medieval de Galicia". Os restos de Fernando II, Afonso VIII (IX), Berenguela, o conde de Galicia Raimundo de Borgoña, o conde de Traba Pedro Froilaz e Xoana de Castro, que foi raíña de Castela, están custodiados neste espazo.
