O temporal derruba parcialmente a Capela das Angustias de Muros

As chuvias caídas na mañá deste sábado 24 de decembro provocaron o derrubamento dun muro e de parte do teito da Capela das Angustias, situada na vila de Muros. A forza da auga acabou por derrubar o muro lateral e a cuberta da coñecida como Capela de Gracia deste templo, localizada na antiga sancristía. A capela, datada en 1665, está situada onda un cemiterio na parte alta do casco histórico e anexa á rúa do Hospital, que se fechou ante o risco de novos desprendementos.